من قالديم

سنين آردينجا سرگردان دولانماق قالدي، من قالديم
او سوزگون گوزلرين عشقينده يانماق قالدي، من قالديم

سنه تقديم ائتديم كونلومو، مين پاره قايتاردين
منه مين پاره كونلومدن، اوتانماق قالدي، من قالديم

محبت گولشنينده دسته دسته گوللريم سولدو

تيكانلار كولگهسينده دالدالانماق قالدي، من قالديم
كؤنول جامينده عشقين داشلاناركن، مندن آيريلدين
چاخير دولموش چاناغلار تك، جالانماق قالدي من قالديم

بزهنميشدير سنيله، گوللريله، اويغولار بزميم
شيرين ايستكلي رويادن، اويانماق قالدي من قالديم

بيلين، عشقين سماسيندا دمير جايناغلي قوزغون وار
دمير جايناغلار آلتيندا، تالانماق قالدي من قالديم

دئديم ايستك بوتاغيندان چيچك دهرمك سعادتدير
تيكانلار خنجريله، پارچالانماق قالدي من قالديم

دئديم جاندان كئچن عاشيق محبتدن زيان گؤرمز
بو سوداده قيزيل قانه بويانماق قالدي من قالديم