نه بيلهيديم

من اوزهرديم گئجهلر آيدين اميدلر دنيزينده چيرپينارديم گويهنركن ديلكين شانلي دوزونده
پارلايارديم بولود آلتيندا كي پارلاق گونشين نور خياليندان
اوجالارديم جلاليندان
سؤيلهيرديم اميديم وار، داياغيم وار
بو قارانليق گئجهلرده بولود آلتيندا كؤزرميش گونشيم تك چيراغيم وار
من اميدلر قاناديلا اوجالارديم
كؤرپه ترلان كيمي گؤيده
گونشين شعلهسين اولدوزدان آلارديم

نه بيلهيديم
نه بيلهيديم كي اجل اووچوسو اوخ يونمادا گيزلين تله قورماقدا
زامان تك تلهسرميش
نه بيلهيديم كي اؤلوم يئللري گويلرده اسهرميش
نه بيلهيديم كي زامان پنجهسي گاهدان
گونشين بوينونا گيزلين دولاشاركن
نفسين اوردا كسهرميش

دئديلر فاجعهلر قورقوسو گويلرده قورولدو
دئديلر پارلاق اميدلر بولود آلتيندا بوغولدو
الين اللردن اوزولدو، اوجا باش «ساهر»ين اؤلدو
نه دانيشديم
نه چاليشديم

اورهگيمده آليشان داغ
يوكسهليب داغ كيمي كوكسومده اوجالدي
ايلديريم شاخدي گوزومدن
عزانين مارشيني چالدي
بيرده گوردوم كي بوتون اولكهميزين غملري
توتغون اورهگيمده ييغيليب
تاپدالانيرلار
بير زامان گوردوم اميدلر
كوكسومون قان دنيزينده
آل آلوولارلا
يانيرلار